Fasnacht 2024 – S got emmer weder schnöu ond scho esch dä ganzi Spass weder verbi! Gstartet sei mer metem „Mer-schiesse-dri-Mettwoch“ z Altishofe am Schlossruggerball. Dä esch de nämli ganz gsöffig usecho ond mänge Gronzer het ned vor de 4e de Heiwäg ahträte 🍻. Witer gange esches dorom de metem „Erste-Kater-Donnstig“. För dä hei mer weder üse Party-Wage föregno ond sei met dem uf ond dör Altbüre düsed🚜. Am Obe hei mer de grad döffe dete blibe zom die Party weiterfeiern bes ih die früeche Morgestonde. So esch de nämli ou gli de „Emmer-no-es-Müüh-blau-Fritig“ vor de Töre gstande, wo üs uf Reide gfüehrt het. Ou dete hei mer weder chönne ihboote uf üses Wägeli ond so sei mer de guggend de Omzug abgfahre. Z Reide hei mer ou weder einisch üsi Frönde, d Blächschränzer ahtroffe ond wöu mers so guet hei, hei mer weder einisch zäme eis döffe spele. Wie emmer esch das es riese Freud gse, danke üch vöu mou 🥰! Am Obe hets de för üs gäge die 12i no de letzti spoti Uftrett gäh vo dere Fasching-Saison, wo noch s de nomou ad Bar gange esch zom es Lecka-Schmecka-Bierchen z schlörfe. Am nöchste Morge hei mer natürli weder Programm gha. De „Mer-mögid-ned-Omzog-loufe-Sonntig » het üs weder uf Altishofe brocht. Zerst sei mer aber vo üsne Passiv-Mitglieder ganz fein met Älpler-Magrone bekocht worde. Das esch de mou öbbis feins gse 🤩! Dorom wei mer üs ah dere Stöu ganz härzlech bi üch bedanke för die geniali Verköstigung! Ou för üses Obe-Programm hei mer ned mösse witerreise, sondern mer sei grad dete blobe ond hei üs es Fäschtli gmacht 🥳! So esch de ou scho üse fascht freii Mäntig ahgstande. Det heissts nämmli alle erst am Obe ahtanze. D Froue hei sech dorom e gmüetleche Pizza-Schnousi-Nomi met ahschliessendere Wii-Wanderig gmacht. D Manne hei sech onderdesse met Böller abloh ond em Usefende vo de Schmenki för Obe beschäftigt. Es heisst jo nämli ned omsöst „Manne-chöi-ou-schminke-Mäntig“. So sei mer de alli aus Müslüms bemoled worde. Üsne Manne (ond Froue) sei die Bärt haut scho guet cho 🤪! Met dere wonderschöne Schmenki sei mer de uf Pfaffnau gfräsed ond hei ou grad no üses Klavier metgno. Dass d Gronzer am Güdsimäntig alle chli lostig dehär chöme, esch för de meiste bekannt. Die „frömde“ Guggene hei üs aber scho zemmli komisch ahluegt🤣. Das het üs aber ned devor abghaute, nomou Gas z gäh! Ond so esch de ou scho „Hoor-schnide-Zistig“ worde, üsi letzti Fasching-Tag. Dä het üs zerst ah Omzug z Sursee füehrt. Bi wonderschönem Wätter hei mer no es letzts Mou uf üsem Party-Wage döffe eis gugge ond sei de ou eso zode Baragge chauffiert worde, wo mer zäme sei go schnouse. Es riese Cordon-Bleu hets gäh😁! Mer sei de aber no e Station witer uf Wauwil, wo mer am Fasnachtsfüür nocheme chline Ihzug hei döffe d Fasnacht loh usklinge loh. Met Feuer und Fanfaren hemmers no einisch s rechtig gnosse ond üs de för es letzts Ahstosse ad Bar begäh. Es esch weder einisch meh e soumässig tolli Ziit gse met soumässig tolle Lüüt 🐷🤩! Mer wend üs ganz fest bi aune bedanke, wo üs dör ehri Onderstötzig e sone tolli Fasnacht ermöglicht hei. So send das üsi drü Fahrer, wo üse Party-Wage dör d Gässli gfüehrt hei: Anton, Marco ond Louis, danke vöu mou, hend ehr üses Spassmobil glänkt 🥳🚜! De natürli ou üsne eigete Vereinsmitglieder ond Büsslifahrer, ohni üch hätte mer zemmli oft weder de Wäg zom Fäscht no üsi Instrumänt gfonde. Es grosses Merci ah üchi Fahrbereitschaft 🤗! De got natürli ou es ganz es grosses Dankeschön use ah üse Tourplaner. Lücu, danke vöu vöu mou, hesch du för üs sones genials Fasnachts-Programm zämegstöut ond organisiert. Ou wenn d Ziite ond Ört mängisch ned ganz gstomme hei, mer sei ömu (meistens) emmer dete gse, wo mer hätte selle si 🤪. De wei mer natürlech üse El Don Presidente ned vergässe, wo üse Söilihuufe betreut. Danke ou der Jönu för dini gleisteti Vereinsarbeit. Mer schätzid dech ond dini Art aus Präsident sehr ond hoffe uf vöu witeri Johr met der😁! So, ond etz zom Schloss möchte er no es riesegrosses Merci ah üse neui Tambi usspräche. Dave, danke vöu vöu mou för dine Ihsatz, dini Arbeit ond dini Gedold, wo du üs während dere Fasnacht entgägebrocht hesch 🤗🤝! Mer sei ned emmer die eifachste, aber du hesch dä Huufe super gmeistered! Es esch emmer e brutali Fete gse met der uf de Böhni ond mer hei Freud, dass du üs musikalisch ahfüehrsch ond üs dör die Fasnacht begleitet hesch. Danke vöu mou🔥! „Nicht jeder hat das Schwein, ein Grunzer zu sein!“ Bes baud, Ricke-Grunzer Ebersecken